Stöðugt verði unnið að því að fyrirtækið sé heilsueflandi vinnustaður.

ÁTVR framfylgi stefnu stjórnvalda um bætta lýðheilsu og samfélagslega ábyrgð í áfengis- og tóbaksmálum í sátt við samfélagið.

Hornsteinninn í samfélagsábyrgð fyrirtækisins er ábyrg sala áfengis. ÁTVR leiti leiða til að draga úr skaðlegum áhrifum áfengis, með eigin aðgerðum, áætlunum og í samvinnu við aðra.

Allt starfsfólk ÁTVR njóti sömu virðingar og hafi jafna stöðu innan fyrirtækisins. Jafnlaunavottun verði viðhaldið og unnið sé eftir jafnréttisáætlun fyrirtækisins.

Að engin mismunun eigi sér stað gagnvart fólki sem vinnur með söluvörur fyrirtækisins - hvar sem er í aðfangakeðjunni.

ÁTVR er eftirsóknarverður og samheldinn vinnustaður þar sem samskipti einkennast af jákvæðni, virðingu og trausti.

Áhersla er lögð á að starfsfólk geti vaxið í starfi og aflað sér þekkingar sem stuðlar að frábærri upplifun viðskiptavina.

Söluvörur fyrirtækisins séu framleiddar samkvæmt alþjóðlegum samþykktum og siðareglum og við aðstæður sem eru góðar bæði fyrir starfsfólk, umhverfi og samfélag.

Hvetjum viðskiptavini til að velja sjálfbæra vöru. Markmiðið fyrir 2030 er að meirihluti vöru sé vottaður af þriðja aðila. ÁTVR er þáttakandi í kerfi sem metur vottanir þriðja aðila.

Beint verði sjónum að umbúðum vöru og áhersla lögð á sjálfbært efnisval í vöruframboði og framkvæmdum. Hringrásarhagkerfið eflt með endurnotkun og endurvinnslu á úrgangi hjá Vínbúðunum. Einnig verði skoðað úrval af fylgihlutum og áhrif þeirra á umhverfið.

Loftslagsmarkmið ÁTVR til ársins 2030: 50% samdráttur í losun gróðurhúsalofttegunda í virðiskeðjunni miðað við árið 2020, en 99% kolefnislosunar liggur þar.

Vöruumbúðir, sérstaklega þungt einnota gler, er stærsti losunarþátturinn vegna mikillar orku sem fer í að búa það til. Markmiðið er að skipta sem mestu af því út fyrir sjálfbærari umbúðir.

Áhersla er lögð á orkusparnað framleiðenda og samdrátt í losun koltvísýrings (CO₂). Sjónum verði beint að orkunotkun og áhersla lögð á endurnýjanlega orku í öllu framleiðsluferlinu ásamt sjálfbærum ræktunaraðferðum, t.d. bindingu kolefnis.

Hluti vörusafns ÁTVR er framleiddur samkvæmt viðurkenndum sjálfbærnivottunum sem taka til sjálfbærrar landnýtingar, verndar líffræðilegrar fjölbreytni og heilbrigðs jarðvegs. Fyrirtækið vinnur markvisst að því að auka hlutfall vottaðra vara með það að markmiði að meirihluti vörusafns uppfylli viðurkennda sjálfbærnistaðla fyrir árið 2030.

ÁTVR hefur hafið greiningu á náttúruáhættu í virðiskeðju með hliðsjón af leiðbeiningum TNFD, meðal annars tengdri ræktun, vatnsnotkun og jarðvegsheilbrigði í upprunalöndum vara.